Mér finnst rigningin góð

Verð að smella hingað inn nokkrum myndum af Evu Dröfn og vinkonunum í dembunni sem var hérna rétt áðan.

Það væri ekki slæmt að vera bara barn og virkilega njóta þess í botn að sulla í pollunum . Kannski maður ætti bara að prófa..?

Birgitta

Ferðasagan

Loksins er búið að rofa nógu mikið til í kollinum á mér til að ég geti komið frá mér smá ferðasögu.

Ferðalagið hófst hjá okkur börnunum með flugi til New York þann 12.júlí.
Börnin mín eru auðvitað orðin svo stór að það var minnsta mál í heimi að ferðast með þau. Það var helst að ég ætti í vandræðum með að halda henni Evu Dröfn úr Fríhöfninni .
Við tókum svo leigubíl á hótelið sem var mjög vel staðsett rétt við Times Square. Þar hittum við pabbann okkar og það voru sko fagnaðarfundir. Börnin voru hálf-þreytt en við ákváðum samt að við yrðum að taka einn stuttan göngutúr út á Times Square til að sýna þeim dýrðina. Þeim þótti þetta jú, nokkuð flott en virtust þó vera hrifnust af öllum búðunum! M&M búðin á þremur hæðum, ToysRUs og fleiri heilluðu þau alveg uppúr skónum.
Okkur tókst þó að draga þau inn á herbergi og ná þeim í bælið.
Næsta dag fórum við upp í Westchester að hitta Inspectorinn sem fór yfir húsið okkar - mig vantar góða þýðingu á þessu starfsheiti, það sem hann gerði var að fara yfir allt húsið frá grunni til loftnets og skilaði okkur 33 síðna skýrslu um ástandið - þarna var hann semsagt að fara yfir öll þessi atriði með Guðmundi. Á meðan þeir potuðu í jarðveg, skoðuðu rör og leiðslur og eitthvað meira, skoðuðum við börnin húsið. Krakkarnir urðu mjög hrifin af herbergjunum sínum og þau voru bara enn sáttari við þetta allt saman.
Það er virkilega góður andi í húsinu, okkur leið öllum alveg eins og heima hjá okkur þó svo við værum ekki með neitt af okkar dóti þarna og eigandinn og börnin hans væru þarna á vappinu .
Við enduðum svo ferðina til Scarsdale á því að skoða skólana sem börnin munu fara í næsta haust og það jók bara á spennuna.
Við vorum í New York fram á sunnudag og náðum að gera alveg heilmargt á þessum stutta tíma. Árni keypti sér risastóra Air Force One, fjarstýrða flugvél sem við fórum með í Central Park, við fórum upp í Empire State, fórum og sáum Lion King á Broadway, versluðum einhver ósköp af leikföngum og fötum, borðuðum góðan mat og bara höfðum það virkilega gott.

Á sunnudeginum brunuðum við svo af stað til Atlantic City. Það er ekki nema rúmlega 2ja tíma akstur þangað frá Manhattan. Þar var tímanum eytt á ströndinni að "sörfa", pínu gambl og leti. 
Þarna vorum við í 3 nætur en síðasti dagurinn fór í 14 tíma ferðalag - akstur á flugvöllinn í Philadelphia, flug þaðan til Boston, rútuþvælingur á flugvellinum í Boston og svo flugið heim til Íslands.

Í heildina alveg frábær ferð og ég held að við séum öll jafn hrifin af því sem Ameríka hefur upp á að bjóða (sem er nánast allt sem manni dettur í hug ).

Birgitta

Sumarbúðir, ferðalög og fleira

Þá er ég loksins búin að endurheimta bæði börnin úr sumarbúðunum.
Þau eru alsæl með dvölina og eru mjög dugleg við að þylja upp ýmiss vers og ritningar við hvert tækifæri sem gefst. Þau lærðu margt gott um fyrirgefningu, umburðarlyndi og náungakærleika - verst bara að þau lærðu ekkert um fyrirgefningu systkina, umburðarlyndi gagnvart systkinum og systkinakærleika .

Árni Reynir virðist ekki hafa verið eins fyrirferðamikill og Eva Dröfn, að minnsta kosti eru fáar myndir af honum á vefsíðu KFUM, en hérna sést honum bregða fyrir.

Hann veiddi ekkert, þrátt fyrir spúninn frá afa, en það veiddi enginn neitt svo það er spurning hvort það séu einhverjir fiskar þarna yfir höfuð?

 

Næst á dagskrá hjá fjölskyldunni er ferð til New York á morgun. Við ætlum að taka okkur eina viku og skoða m.a. Empire State bygginguna, American Museum of Natural History (safnið í Night at the Museum), Times Square (og ToysRUs auðvitað!), hinar og þessar búðir komnar á Planið - America's Hobby Center, Build a Bear og svo tekst mér vonandi að draga Köru með mér í eina eða tvær fata- og skóbúðir.

Svo ætlum við auðvitað að skoða tilvonandi heimilið okkar. Ég held að börnin séu spenntust yfir því .

Ætla að smella hérna tveimur gullkornum frá Evu Dröfn í lokin.

Ég veit nú ekki alveg hvernig henni dettur þetta í hug en hún spurði um daginn: "mamma, erum við milljarðaræningjar?"
Og í einhverri landafræðiumræðunni: Mamma, hvernig álfur er eiginlega heimsálfur?
- jahérna hér .

Birgitta

Bækur handa þér

Til vina og vandamanna:

Ég er með um 100 stykki bækur sem ég ætla hvorki að flytja með mér út né geyma en vil alveg endilega koma þeim til einhverra sem hafa áhuga. Þetta eru alls konar bækur - eitthvað eftir John Grisham, Patriciu Cornwall, Michael Crichton og svo bara sitt lítið af hverju.

Ef þú hefur áhuga kíktu þá endilega í heimsókn næstu daga og nældu þér í eina (eða tvær, þrjár, fjórar eða fleiri ).

Birgitta

Stund milli ... barna

Alls ekki stríða !

Árni Reynir hélt glaðbeittur af stað í Vatnaskóg í morgun. Hann fór með bekkjarfélaga sínum og vini og var að springa úr spenningi.
Sérstaklega af því að hann var með veiðistöng með sér - og ekki bara einhverja veiðistöng heldur hafði hann fengið lánaðan spúninn hans afa síns og það er sko það flottasta ever! Það fengu sko allir að heyra það!

Ég er því bara í rólegheitum þar til klukkan 17 þegar ég fer og sæki Evu Dröfn sem er að koma úr Vindáshlíðinni.

Ég skal alveg viðurkenna að mitt ungamömmuhjarta er alltaf pínu órólegt þegar börnin eru svona "langt" í burtu. Það er því alveg meiriháttar að geta fylgst með ungunum sínum á vefsíðu KFUM. Þar fann ég t.d. þessar myndir af sponsinu mínu og frænkunni:

 

 

 

 

 

 

Það er greinilegt að henni hefur ekki leiðst. Ég hlakka mikið til að heyra sólarsöguna þegar ég hitti hana á eftir .

Svo mæli ég eindregið með því að senda systkini á sitthvorum tímanum í svona ævintýri. Þau hafa voðalega gott af því að fá frí frá hvoru öðru og upplifa að vera "einkabarn" í eina viku.

Birgitta

Fjörugar frænkur

Frænkugisting í gangi og mikið fjör og enn meira gaman.

Af því mömmur leyfa oft meira en vanalega þegar frænkur eru að gista báðu þær um að fá að mála hvora aðra - og fengu leyfi til þess.

Þær byrjuðu skrautlega

 og enduðu hrikalega!

 

 

 

 

 

Ég verð að viðurkenna að ég fékk nett sjokk að sjá þær og bað til guðs að þessi stríðsmálning myndi renna af jafn ljúflega og hún rann á. Það var ekki alveg svo gott!
Heilu handklæði, hálfum sápubrúsa og miklu nuddi síðar eru þær orðnar nokkuð líkar litlu sætu stelpunum sem þær voru fyrr í kvöld.

Þetta  var samt ekki næstum eins slæmt og þegar Eva Dröfn var nýbúin að kynnast einni vinkonu sinni. Þær voru uppi í herbergi að leika, rosalega hljóðar og góðar - þá hefðu viðvörunarbjöllurnar átt að fara af stað! Þær komu svo niður í eldhús og spurðu hvort þær væru ekki fínar?
Þá voru þær búnar að dunda sér við það í rólegheitum að klippa hvora aðra . Ég þurfti því að labba yfir, kynna mig fyrir mömmunni með nýju vinkonuna kiwiklippta við andlitið. Mamman meira að segja búin að vera að berjast við að láta hana safna toppi í marga mánuði.
Hún tók þessu sem betur fer rosalega vel, alveg lygilega vel eiginlega. Þær fengu meira að segja að leika sér saman aftur .

Birgitta - (með öll skæri heimilisins í gíslingu)

Svæfum bara kisu...

Við erum svoldið búin að vera að vandræðast með hvað við eigum að gera við kisu þegar við flytjum út. Eva Dröfn kom með lausnina í gær:

E: Mamma, ég held við verðum bara að svæfa Krúsí þegar við flytjum!
M: Ha? Heldurðu það?
E: Já, ég held að henni myndi líða illa í flugvél og í sóttkví og þá er bara best að svæfa hana.
M: En eigum við ekki frekar að reyna að finna eitthvað gott fólk sem vill eiga hana?
E: Nei, ég vil frekar að við svæfum hana!
M: Humm, mér finnst það nú ekki góður kostur.
E: Jú, svo vekjum við hana bara þegar við flytjum aftur heim!

Jahá, þabbla þa

Húsamálin að skýrast

Jæja, þá eru málin loksins að komast á skrið .
Í síðustu ferð skoðuðum við aftur húsið sem er hérna að neðan og vorum jafn hrifin og fyrst. Málið var bara að það var komið samþykkt tilboð í húsið. Við erum bara svo heppin að í USAnu eru kauptilboð ekki samþykkt fyrr en búið er að fá Inspector til að skoða húsið, báðir aðilar eru búnir að láta lögfræðingana sína fara yfir tilboðin og báðir aðilar búnir að undirrita.
Við náðum semsagt einhvers staðar inn í það ferli og húsið verður líklega okkar .
Nú er bara að krossa putta og vona að enginn poti sér inn í okkar ferli og nái af okkur húsinu.
Reyndar segir hún Susan fasteignamiðlari að seljendurnir séu komin með nóg og að þau muni ekki taka öðru tilboði - öðru en okkar þ.e. - svo ég er bara nokkuð bjartsýn.

Eva Dröfn fær þá prinsessuherbergið sitt, Árni Reynir prinsaherbergið og við hin stór og góð herbergi, húsið er allt í toppstandi, nýuppgert og ferlega flott.
Ég verð reyndar að hryggja ykkur með því að það er ekkert gestaherbergi  en skrifstofan og fjölskylduherbergið eru alveg nógu stór fyrir svefnsófa og nokkra gesti .

Nú á ég bara eftir að fá að vita hvenær við fáum afhent, finna leigjendur að húsinu mínu hér og bretta svo upp ermar og byrja að pakka .

Birgitta

Húsafréttir

Þá er maður kominn heim úr húsaskoðunarferð númer 2 og hún gekk nú frekar betur en sú fyrri. Það er ólíkt annað að skoða hús með það fyrir augum að kaupa það en þegar maður er að hugsa um að leigja. Núna gat maður skoðað með því hugarfari að maður gæti breytt og bætt - eitthvað sem er víst frekar hæpið að ætla sér ef maður er að leigja.

Við skoðuðum 11 hús og leist vel á 4 þeirra. Ekkert með sundlaug en við sáum líka að þar sem voru sundlaugar voru þær frekar sjabbí og subbó og það er greinilegt að þeim fylgir mikið viðhald og vinna.
*svo, þið sem ætlið að koma í heimsókn getið skilið keppnissundbolinn eftir heima - takið bikíníið endilega með því það má liggja í sólbaði þó það sé engin sundlaug *

Hverfin sem við erum að skoða heitir Scarsdale og Ardsley - það er svona eins og Vogar/Sund, eru alveg hlið við hlið. Þetta er ca 30 mín norðan við Manhattan í sýslu sem heitir Westchester. Þetta er allt voðalega krúttulegt og sætt, stutt í allt og góðir skólar og maður sá börn að leik úti og á rölti "in the Village" svo þetta virðist vera þokkalega secure svæði.

Nú er bara að sjá hvort maður smelli tilboði í eitthvert húsanna og hvað kemur svo úr því.

Birgitta

Húsaskoðun - taka 2

Það er allt útlit fyrir að við þurfum að taka annan hring í húsaskoðun mjög fljótlega. Húsin hreyfast mjög hratt og forsendurnar hafa aðeins breyst hjá okkur og nú er komin ný hrúga af húsum sem við þurfum að skoða.

Þetta væri bara gaman ef maður þyrfti ekki að taka 5 tíma flug í hvert skipti sem maður ætlar að "kíkja" á nokkur hús - tala nú ekki um ef manni þykir jafn-leiðinlegt í flugvél og mér!

Nú eru bara ca 2 mánuðir þangað til við hefðum viljað vera flutt og því langar mig að drífa þetta af og finna hús ASAP. Finnst frekar óþægilegt að hafa þetta svona í lausu lofti  - erum að flytja en vitum ekki hvert, hvenær, hvernig eða hvers vegna (jú kannski hvers vegna...).

Ég verð vonandi með meiri fréttir í næstu viku.

Birgitta