Orð í litum

Mér hefur alltaf þótt sjálfsagt að orð og bókstafir eigi sér sína ákveðnu liti. 

Það var ekki fyrr en Hellisbúinn fékk hláturskast yfir því að nafnið hans væri húðlitað að það hvarflaði að mér það væru ekki allir svona.
Hellisbúinn var alveg með það á hreinu að ég væri bara að bulla, hló bara og kom með fyndin komment ().
Ég held hann hafi haldið að ég væri að búa þetta til - af hverju ég hefði átt að gera það veit ég svosem ekki.

Ég er auðvitað ekki hrifin af því að vera álitin bullukollur svo ég fór á stúfana og reyndi að finna einhver dæmi um þetta. Það gekk ekkert voðalega vel því ég vissi ekki að hverju ég var að leita.
Datt svo á endanum inn á Vísindavef Háskólans, sem er einn skemmtilegasti vefur sem ég veit og fann þar allar upplýsingar um þetta fyrirbæri sem heitir víst samskynjun.

Komst að því að það að sjá orð og bókstafi í litum er algengasta samskynjunin.
Hún getur samt verið á ýmsa vegu eins og þessi kafli greinarinnar sýnir:

Fleiri dæmi um samskynjun eru að sjá tóna eða tónlist í litum og að finna bragð af orðum. James Wannerton frá Blackpool í Englandi segist til að mynda alltaf hafa fundið bragð af beikoni þegar hann hafði yfir þessa línu úr Faðirvorinu í skóla: “Fyrirgef oss vorar skuldir.”

Ekki amalegt það .

Þar til næst...

B

Athugasemdir

[Marta (IP-tala skráð) 27.2.2007 kl. 20:09]

Hvernig er Marta á litinn? Hún hlýtur að vera rauð frekar en græn...

[Birgitta, 27.2.2007 kl. 20:17]

Mmm nei, Marta er alveg svona ljósljósgul .
Held að það séu sérhljóðarnir sem stjórni litnum, þarf að pæla betur í þessu.

[Birgitta, 27.2.2007 kl. 20:17]

Skrítið - liturinn kom ekki með

[Kleópatra Mjöll Guðmundsdóttir (IP-tala skráð) 28.2.2007 kl. 01:27]

hey ég sé tónlist í litum ...

vá hélt stundum að ég væri eitthvað klikk

hvernig er kleópatra á litinn???

[Ólafur fannberg, 28.2.2007 kl. 08:42]

svarthvitt...

[Birgitta, 28.2.2007 kl. 08:43]

Kleópatra er svona dökk, dökk kóngablátt, næstum út í fjólublátt. Ferlega kúl að sjá tónlist í litum, væri alveg til í að prófa það .

[Hulda Dagmar Magnúsdóttir, 2.3.2007 kl. 17:11]

Vá ég hef heyrt um að fólk sjái tónlist í litum og finnst það stórmerkilegt, en ég hef aldrei heyrt um orð og stafi í litum. Er ekki soldið gaman að hafa lífið svona litskrúðugt?