Bölvuð?

Ég hlýt að vera undir einhvers konar bölvun!
Ég er búin að missa af báðum brúðkaupunum sem mér var boðið í í sumar -  og bæði voru brúðkaup sem mig virkilega langaði að vera viðstödd.
Náði reyndar athöfninni í gær, en náði ekki veislunni þar sem klóið mitt þurfti áríðandi á faðmlagi að halda. Mikið er ég samt fegin að ég náði að komast í athöfnina
Ég er farin að hallast að því að forlögin hafi komið í veg fyrir að ég færi í brúðkaup í sumar - líklega vegna þess að ég hefði eyðilagt fyrir einhverjum ef ég hefði verið á svæðinu. Kannski skálað af of mikilli innlifun og orðið mér og brúðhjónum til skammar, eða dottið á brúðartertuna, eða spurt systur brúðgumans hvort hún væri mamma hans, eða spurt brúðurina hvað hún væri komin langt á leið - eða eitthvað í þessum dúr .

En athöfnin var einu orði sagt yndisleg!  Mikið ofsalega var hún falleg, ég fæ ennþá tár í augun þegar ég hugsa um hana. Ég held ég hafi bara aldrei séð fallegri brúður og klökkari brúðguma . Ræðan létt og skemmtileg en samt ofsalega falleg, söngurinn alveg meiriháttar og bara yndislegt allt. 

Ég ætla hér með að fara fram á myndasýningar! Eina í Mávahlíð og eina í Þingásnum - sem allra, allra fyrst!

Bettý og Sjonni - innilega til hamingju með gærdaginn og hvort annað. Megið þið alltaf vera jafn hamingjusöm og yndisleg.

Athugasemdir

[Martasmarta (IP-tala skráð) 20.8.2006 kl. 22:31]

Vona að þú sért orðin frísk, hetjan mín! Hlakka til að ráðast á kennarana með þér í fyrramálið...