Magni Okkar

Ég hef, eins og svo margir aðrir, fylgst með Magna Okkar í Rockstar Supernova undanfarnar vikur.
Finnst hann standa sig frábærlega!
Og ef maður á að trúa spjallþráðum á vefnum þá gæti hann bara alveg haft það sem þarf til að vinna þessa keppni. Nema helst til sviðsframkomu (ekki nógu mikið sjó) og klæðaburð (vona að hann fari nú ekki að apa eftir Zayru).
Samt, þegar ég horfi á raunveruleikaþættina þá finnst mér hann stundum ekki vera alveg 100% í þessu. Gæti verið - bara svona pæling sko - að Magni vilji ekkert endilega vinna þessa keppni? Ég get alveg séð fyrir mér að hann hafi tekið þátt í prufunum bara svona upp á fönnið og jafnvel ekkert spáð í framhaldinu. Jafnvel ekkert átt von á því að vera kominn hálfa leið yfir heiminn nokkrum vikum seinna. Hvað þá að þurfa að setja það á Planið að flytjast út í geðveikina í Hollívúdd.
Það er nefnilega svoldið annað að vera heimsfrægur á Íslandi eða vera Heimsfrægur .
Hvað sem þessum pælingum líður þá er mjög gaman að fylgjast með honum - ég er t.d. ein sem vissi varla hver hann var áður en hann fór út - og ég vona að hann komist eins langt og hann sjálfur óskar.

Þar til næst...

B

Er hamingja kvenna mæld í kílóafjölda?

Ég veit allt um hvað offita og hreyfingarleysi getur haft slæm áhrif og hreinlega verið hættuleg enda er ég frekar að tala um "mjúku" konuna. Svona Monroe týpur - sem þóttu einu sinni megabeib. Ef maður les blöðin og fylgist með auglýsingum í hinum ýmsu miðlum þá er ekki annað að sjá en að kona geti ekki verið hamingjusöm nema hún sé í (eða helst undir) kjörþyngd. 
Hver ákvað að kona þyrfti helst að vera eins og tíu ára strákur í laginu til þess að vera "flott"?
Hverjum finnst það "flott"???
Frekar perralegt ef maður hugsar útí það.
En aftur að upphaflegu pælingunni.

Getur kona sem er yfir kjörþyngd verið virkilega trúlí hamingjusöm? Er hún kannski alltaf með þessi "auka"kíló í kollinum - hvað sem hún tekur sér fyrir hendur?
Þegar hún verslar í matinn.
Þegar hún kaupir sér föt.
Þegar hún fer í saumaklúbbinn.
Þegar hún fer í sund.
Þá er ég ekki að meina að hún sé heltekin af þessu, heldur meira að þetta sé alltaf þarna "in the back of her mind" - svona eins og karlmenn hugsa um kynlíf 10 sinnum á sek.

Svona eins og með hár. Fyrir 50 árum síðan þótti allt í góðu að konur hefðu smá lubba á fótunum eða undir höndunum.
Í dag eru konur "ógeðslegar" með þessi sömu hár. Eiga helst ekki að hafa hár á lærum, handleggjum, andliti eða annars staðar á líkamanum - erum við ekki komin aftur að 10 ára stráknum? Hummmm?

Hvar endar þetta eiginlega? Ég bara spyr?!

Þar til næst...

B (loðin, mjúk týpa á leiðinni í vax og megrun).

Wizard of Oz, ET og fleiri

Er dottin í nostalgíugláp með börnunum.
Þau horfðu nefnilega á Galdrakarlinn frá Oz með ömmu sinni og afa og þá fór ég að hugsa um allar hinar snilldar myndirnar sem maður horfði á sem krakki. Var svoldið forvitin að sjá hvað nútímabörnum þætti um þessar myndir og það er alveg ótrúlegt hvað þær eldast vel - langflestar alla vega. 
Undanfarna mánuði erum við semsagt búin að horfa á Indiana Jones, Mary Poppins, gömlu Star Wars myndirnar (reyndar fyrir svolitlu síðan), við mæðgurnar horfðum á Grease og Xanadu (drengurinn strækaði á þessar),  ET og Galdrakarlinn en þá er ég eiginlega bara stomp.
Væri gaman að fá uppástungur um fleiri myndir. Svona þessar sem "maður finnur alvöru tilfinningar þegar maður horfir" eins og skottan mín komst svo skemmtilega að orði þegar við kláruðum ET í gærkvöldi .
Þannig að ef þú sérð einhverja sem þér finnst vanta á listann þá endilega smelltu henni inn í Athugasemdir.

Þar til næst...

B

Ps. *Galdrakarlinn frá Oz er reyndar skylduáhorf fyrir alla, sama á hvaða aldri. Það er varla bíómynd, sjónvarpsþáttur eða bók sem vitnar ekki í þá mynd á einn eða annan hátt. Ég var svo heppin að fá að horfa á hana 3852 sinnum þegar litlu systur mínar voru yngri svo ég kann hana utanað  og það er alveg ótrúlegt hvað það eru margar tilvísanir í myndina. Líka alveg lygilegt að maður geti horft á hana í 3853 og 3854 skiptið og haft bara gaman af .*

Hroðalegar auglýsingar

Hvað er þetta með KFC auglýsingarnar á Skjánum (og kannski fleiri stöðvum)???
Held ég hafi sjaldan eða aldrei séð auglýsingar sem fá mig til að langa ALDREI inn á staðinn sem verið er að auglýsa.
Virkilega illa leiknar (no offence leikarar), þvingaðar og uppstilltar eitthvað og bara generallý mjög óaðlaðandi. Ætla sko EKKI á KFC fyrr en þeir koma með almennilegar auglýsingar - svona auglýsingar sem freista! Og hana nú!

Fyndið, komst að því við skrifin hér að ofan að ég horfi bara á Skjá 1 þessa dagana - og bara á einn þátt!  Og gettu nú !
Jújú, Rockstar Supernova.
Ferlega fyndið hvað maður uppveðrast af öllu sem einhver af hinum 300 þúsund Íslendingunum er að gera.
En Magni Okkar stendur sig bara snilldarvel og ég segi bara Gó Magni!

Mikið hlakka ég samt til þegar haustar og maður getur kveikt á TVinu og séð eitthvað skemmtilegt, spennandi eða bara hreinlega áhugavert.

Þar til næst...

B

Ekki bakka!!!

Vissir þú það að ef tveir bílar eru að bakka og annar bakkar á hinn þá eru báðir bílarnir í órétti?!

Gerðum góðverk í síðustu viku. Góðverkið krafðist þess að við bökkuðum inni á planinu fyrir framan Bónus.
Annar bíll bakkar útúr stæði sínu og húrrar beint í hliðina á okkur.
Hefðum ekki geta gert neitt til að koma í veg fyrir árekstur - nema kannski fara beint upp eða notað sameindasundurjöfnunartruflarann okkar og látið hann fara gegnum okkur.
Tryggingafélagið segir 50/50 af því báðir voru að bakka! Ef við hefðum verið að keyra áfram hefðum við verið í rétti.
Meikar þetta sens?
Mér finnst ekki! Frekar pirruð á þessu eiginlega.
Og því ætlum við að láta þá rökstyðja þetta aðeins betur og senda þetta fyrir tjónanefnd. Vona að þeir sjái hvað þetta er mikið bull.

Moral of the story... Ekki bakka! Alla vega ef þú kemst hjá því. Ef þú ert á bílaplani og leitar stæðis, keyrir óvart aðeins framhjá draumastæðinu, ekki bakka til að ná því! Farðu frekar hring inn á planið aftur og taktu sénsinn á að draumastæðið sé þar enn!
Var að hugsa um að bæta við moralinn að maður eigi ekki að gera góðverk en þetta góðverk hlýtur að hafa bætt plús í cosmic karmað okkar.

Þar til næst...

B

Lífið...

Mikið er lífið óútreiknanlegt.
Átti ekki von á að hitta Evuna mína fyrr en í lok september en viti menn hún er á landinu. Mikið er ofsalega gott að sjá hana og fá að faðma hana smá, verst hvað ástæða "heim"komunnar er erfið. Er með hugann hjá þér vinkona.

B

Vírusar og vírusvarnir

Rosalega er pirrandi að það skuli vera til fólk sem af einskærum kvikindisskap og illmennsku liggur yfir því vikum saman að búa til vírusa sem geta eyðilagt og skemmt. Vírusar sem eyða öllum gögnum úr tölvum ókunnugs fólks. Jafnvel fjölskylduljósmyndum síðustu 10 ára eða svo!
Ótrúlegt!
Ein tölvan okkar er eitthvað leiðinlegt og vírusvörnin fann heilan helling af tracking cookies - einhver að fylgjast með umferð okkar á netinu og einhverju öðru sem ég kann ekki að nefna en gerir svipað gagn - hverjum þetta gerir gagn hef ég svo ekki hugmynd um... Það er svosem ekert hættulegt en enginn fannst þó vírusinn sem þýðir ekki að hann sé ekki þarna, bara að hann geti verið svona rosalega vel falinn.
Sem þýðir að tölvan þarf að fara í viðgerð!
Sem þýðir fjárútlát upp á einhverja þúsund kalla.
Vona að einhver þarna útí heimi sé ánægður!

Af öðrum vírusum...
Sonur minn var eitthvað undir veðrinu (under the weather) um daginn og ég sagði honum að hann væri líklega með einhvern vírus. Hann var svarar að bragði: "Getum við ekki bara fengið á mig vírusvörn?"
Ef það væri nú svo gott .

Þar til næst...

B

Orkusuga?

Orkan mín kom aftur - með hvelli og látum!!! 
Jibbí jey!!!

Vaknaði í morgun, nennti ekki að lesa fleiri bækur og reif því útúr öllum baðskápum. Henti 10 ára gömlum snyrtivörum án þess að blikna. 5 ára gömlu hársnyrtivörurnar fóru sömu leið. Dittó lyf, krem, sápur og margt, margt fleira sem hefur fengið að flytja með mér milli íbúða undanfarin 7 ár en ekki verið notað síðan 1700 og súrkál. Þetta var þvílíkt liberating, mér líður eins og nýrri manneskju!

Þegar þetta var búið var ég svo uppfull af nýrri, óskiljanlegri orku að ég réðist á búrið. Brotnir blómapottar, jólaskraut sem (sökum hallærisleika eða annarlegs ástands) hefur ekki fengið að fara ofan í jólaskrautskassann, hálfklárað páskaskraut barnanna, allt fékk þetta að fjúka - í ruslið!

Settist við eldhúsborðið og dáðist að sjálfri mér fyrir að gera loksins það sem mig er búið að langa til að mig myndi langa að gera í allt sumar. Og áttaði mig á að ég var bara alls ekki komin með nóg! Hvað gat ég tekið næst? Júbb - geymslan!!! Úffpúff!

Úr geymslunni fóru 3 pokar fata, 2 pokar leikfanga, 1 poki skóa, 3 stk. ferðataska og 2 pokar rusls í Sorpu - sweeeeet.

Þegar mesti hamurinn var runninn af mér (ca við innganginn á fýlufeninu Sorpu) fór ég að spá hvað í ósköpunum fékk mig til þess að vaða í þetta í dag frekar en í gær? eða fyrradag? eða bara einhvern af þeim ótalmörgu dögum sem ég hef haft undanfarinn mánuð?
Og komst að niðurstöðu!
Þetta er allt Hellisbúanum að kenna!
Þegar hann er á landinu sogar hann úr mér alla orku. Og þá hef ég ekki kraft til að gera nokkurn skapaðan hlut. Og geri því mest lítið nema lesa.
Hann er varla farinn úr landi þegar ég rýk á fætur og þeytist um allt með Ajax og svarta ruslapoka. Og hendi stöffi eins og mér sé borgað fyrir það!
Hellisbúinn er semsagt orkusuga (damn! að hann skuli ekki geta verið ryksuga...)!

Annað - sem ég ætti kannski ekki að viðurkenna fyrir nokkrum manni - er að nú er ég komin með fullt af plássi fyrir fullt af stöffi sem mig langar svooooo að kaupa mér....

Talandi um vítahring....

B