Jólabókatíðindi

Jiii, nú eru jólin bara alveg að koma.
Eins og lóan er fyrsti vorboðinn eru Bókatíðindi fyrsti jólaboðinn í mínum huga.

Finnst ekkert smá kósí að sitja við eldhússborðið og láta mig dreyma um allar þær bækur sem mig langar að liggja í sófanum og lesa meðan ég narta í jólasmákökur, skólinn búinn í bili og ég bara í fríii.
Renni líka vel yfir allar barnabækurnar og sirka út þær bækur sem held að börnin hefðu gaman af og allar bækurnar sem mig langar að gefa vinum og vandamönnum í jólagjafir.

Börnin merkja bæði við þær bækur sem þau langar að fá í jólagjöf og ég krossa oft við þær sem ég ætla mér að lesa. Verst að ég gleymi svo strax hvaða bækur það voru og vegna þess að ég fæ alltof sjaldan bækur í jólagjöf les ég yfirleitt engar af þeim bókum sem eru í Bókatíðindum.
Les bara mannskemmandi, enska reifara og vísindaskáldsögur.
Ekkert menningarlegt, íslenskt góðmeti .

Þurfti þó að lesa Sumarljós - og svo kom nóttin fyrir skólann og mikið var það skemmtileg lesning. Mæli eindregið með henni við alla (mamma, þú færð hana lánaða!).

Alla vega, jólin eru að koma...

B

Fleiri bækur í boði fyrir þessi jól en í fyrra

Íslendingar af öðrum kynstofni en Danir?

Fékk góða ábendingu áðan vegna þessarar fréttar - fyrirsögnin hljómar svona:
Ekstra-Bladet sakað um kynþáttafordóma gagnvart Íslendingum

Hvernig geta Danir verið með kynþáttafordóma gagnvart Íslendingum?
Erum við ekki af sama kynþætti?
Erum við meira að segja ekki komin af Dönum (meðal annarra)?

Það er ekki nema Extra Bladet sé bara að tala um þá Íslendinga sem eru af erlendu bergi brotnir? 
Ég held nú samt að hingað til hafi þeir Íslendingar lítið verið að hafa sig í frammi í fjármálaheiminum, hvað þá að þeir hafi sýnt einhverja heimsyfirráðatilburði.

Nema það hafi komið í ljós að Danir séu ekki af sama kynstofni og við!
Og séu þá ekki Frændur okkar Danir lengur!

Hrikaleg tilhugsun!

Þar til næst...

B - heimsyfirráð eða dauði!

 

Ekstra-Bladet sakað um kynþáttafordóma gagnvart Íslendingum

Helgareiginmaður

Það kannast allir við helgarpabba?
Ég á svona helgareiginmann.
Hellisbúinn er á landinu aðra hvora helgi, reyndar alveg í 5 daga í senn en svo líður langur tími í næstu heimkomu.
Börnin eiga semsagt helgarpabba og ég helgareiginmann.

Þetta verður samt tímabundið ástand sem varir vonandi ekki í langan tíma.
Ekki það að við spjörum okkur ekki ágætlega en það er nú betra að hafa hann hérna hjá sér .

Frekar fyndið hvernig allir spennast pínu upp og fara í annan gír þegar pabbinn er væntanlegur. Ég búin að versla í dýrindismáltíðar, tilbúin að smella í gómsæta eftirrétti, passa að það sé nóg til af arinkubbum og kertum og börnin spyrja á 10 mín fresti hvað sé langt þangað til pabbi komi (sko í klukkutímum og mínútum).
Ég komst reyndar að því núna þegar ég pikka þetta að ég er ekki búin að skúra allt og skrúbba hátt og lágt en það er bara útaf því að ég er léleg húsmóðir! Hann tekur hvort eð er ekkert eftir því .

Það verður gott að fá hann heim í fyrramálið, verst hvað það er mikið að gera hjá mér næstu daga, mun lítið geta notið þess að hafa hann heima.

Þar til næst...

B - helgarfrú

Í gæludýrabúðinni

Mér þykir þetta vera orðinn algjör farsi. Það er eins og fátæk lönd séu orðin að gæludýrabúð ríka fólksins...

Þessar ættleiðingar stjarnanna eru farnar að verða alveg eins og gæludýrakaup - "þessi er rosalega sætur, ég tek hann."

Las annars staðar að hún hefði ekki einu sinni fylgt barninu heim frá föðurlandinu heldur verið bissí í leikfiminni sinni á meðan barnfóstran kom barninu til hennar. Frá Malawi.

Ég er ekkert viss um að barnanna bíði betra líf. Jú, stjörnurnar eiga fullt fullt af peningum en er það nóg?
Þær eru líka hundeltar af ljósmyndurum, vinnutíminn er frekar óreglulegur og heimilið oft á tíðum hótel útum allan heim - er það hollt uppeldisumhverfi? 

Mér finnst bara að stjörnurnar eigi að fara gegnum nákvæmlega sama ferli og annað fólk sem reynir að ætleiða barn, þær eiga að þurfa að sanna það að þær geti veitt börnunum betra líf og að þær séu traustsins verðar.

Þar til næst...

B

Madonna hissa á gagnrýni sem hún hefur orðið fyrir vegna ættleiðingar

Hvað þá þetta...

Ég hef greinilega náð að slökkva áður en þessi náði eyrum lillunnar - þökkum guði fyrir það!

Þar til næst...

B

Grunnskólakennari handtekinn vegna mikils magns barnakláms

Fréttir bannaðar börnum.

Þetta mál er svo hryllilegt að ég á ekki orð yfir það.
Þess vegna ætla ég ekki að segja meira um það nema óbeint.

Þetta var fyrsta frétt á dagskrá í sjónvarpinu í kvöld og ég endaði með að slökkva á sjónvarpinu. Yngsta afkvæmið sat við stofuborðið og var að teikna þegar fréttirnar byrjuðu en eitthvað við fréttaflutninginn fékk hana til að fara að fylgjast með. Svo dundu yfir mig spurningarnar:

"mamma, hvað er nauðgun?"
"mamma, af hverju voru menn að nauðga konu?"
"mamma, af hverju er lögreglan að leita að mönnunum sem nauðguðu konunni?"

Og fleira í þessum dúr.
Og ég slökkti á sjónvarpinu.
Og mun ekki kveikja á fréttatímanum aftur meðan börnin eru í nágrenninu.

Var ekki hægt að geyma þetta þar til í 10 fréttum þegar meirihluti barna á að vera farinn að sofa?
Mér finnst það.

Þar til næst...

B

Tveir karlmenn nauðguðu ungri konu fyrir utan Þjóðleikhúsið

Abbababb

Það er ekki einu sinni búið að kanna hvort einhver vilji kaupa þetta - fussumsvei.

Vonandi að þeir sem eru ánægðir með hvalveiðarnar séu bógar í að kaupa nokkur tonn af hvalkjöti .

Þar til næst...

B

Japanar eiga of mikið af hvalkjöti að sögn sendiherra

Staðgengill

Er að spá hvort ég ætti að fá mér staðgengil fyrir Hellisbúann?
Hann er alltaf í útlandinu og þá gæti nú verið gott að hafa einn svona í bólinu hjá sér:

 

 

Þar til næst...

B

Nanana búbú

Ég verð nú að segja að ég er sammála því að við Íslendingar séum að gefa alþjóðasamfélaginu fingurinn.
Ég myndi alveg styðja hvalveiðar ef þetta væri eitthvað sem skipti okkur máli en ég held að það eina sem við höfum uppúr þessu sé neikvæð umfjöllun og leiðindi.

Mín tilfinning er sú að þetta séu eins og litlir krakkar - ég má'idda víst! Ætla bara samt að ger'idda!
Nanana búbú!

Ég held að ef maður horfi í peninga sé hægt að græða margfalt meira á hvalaskoðun en á hvaladrápi. Hvaladrápið getur aftur orðið til þess að túristarnir sem koma hingað til að skoða hvali eða Gullna hringinn eða annað, hætti bara við og fari eitthvað annað.

Ég sé alla vega ekki tilganginn með þessu, kannski getur einhver upplýst mig um hann?

Þar til næst...

B

Fjallað um hvalveiðar Íslendinga í fjölmiðlum víða um heim

Bitin af blogginu mínu ..

Haldiði að færslur mínar hér á blogginu séu ekki bara farnar að bíta mig í botnin!
Það er greinilegt að fleiri sem þekkja mig eru að lesa hérna en ég gerði mér grein fyrir og ég er farin að fá ýmislegt sem ég læt flakka hérna í hausinn frá ótrúlegustu aðilum - og jafnvel eftir ótrúlegum krókaleiðum.

Veit eiginlega ekki hvort ég hef gaman af því eða hvort þetta fari í taugarnar á mér. Verst að það skuli vera til fólk sem tekur því háalvarlega sem ég rita hérna.

Maður verður samt greinilega að passa hvað maður lætur frá sér fara hérna, spurning um að fá óháðan aðila til þess að ritskoða það sem ég sendi frá mér.

Þar til næst...

B